هرگون یئنی بیر ده ییشیم و گلیشمه یه امضا آتان بیر دونیادا یاشاییریق. آرتیق نه قول گوجو نه سرتلیک نه ده ساواش جسارتی تک باشینا بیزی احتیاجیمیز اولان یاشام راحاتلیغینا گؤتوره بیلمیر.
دونیا گلیشیب ایره لیله دیکجه، بیز ده اونون آردیندان آددیملارینی تعقیب ائده رک حیاتین آخیمینا آیاق اویدوروب ایره لیله مه لی ییک.
بو گونوموزده یاشادیغیمیز اونجا تکنولوژی امکانلاری نه واختسا زامانیندا انسانین بئینینده قوردوغو ساده بیر خیالدان عبارت ایدی. آمما بوگون بوتون او خیاللار یاشانیلیر و گؤرونور حالا گلیب چاتیب.
دئمک کی خیال ائتدیگیمیز هر شئی گئرچکلشمه پتانسیئلینه صاحبدیر، چونکو انسان ممکن اولمایاجاق هئچ بیر شئیی تصوّر ائتمه یه قادر دئییلدیر.
بئینیمیزده قوردوغوموز بوتون خیاللارین آنا ماتئریالی، کسینلیکله وار اولدوغوموز بو کاییناتدا مؤوجوددور.
هامیمیز یاشاماق اوچون بو حیاتا گلدیک. گلیشیب بوی آتماق اوچون، بؤیومک اوچون، انکشاف ائدیب اؤیره نیب قازانماق اوچون و اؤزوموزله برابر یاشادیغیمیز بو دونیانی و حتّی کاییناتی ذرّه ذرّه گلیشدیرمک و زنگین لشدیرمک اوچون و ایره لی یه آتماق ایسته دیگیمیز هر آددیم، باشلی باشینا بیرسورو اؤزل امکانلارا محتاجدیر.
بیز او احتیاجلاری الده ائتمک و آددیملاریمیزی آخساتمادان سوردورمک زورونداییق. آمما یاشام تکجه بوندان عبارت دئییلدیر!
هر آددیما آنلام وئرن سونوج اعتباری ایله اؤنجه دن چیزدیگیمیز بلیرلی بیر یول خریطه سی و آیدین بیر مقصددیر. یارانیشا اویغون قوراللار و وار اولمایان بیر شئیی وار ائتمکدیر و او شئی، ایستر معنوی ایستر مادّی اولسون فرق ائتمز!
چوخلاری بیر عؤمور بویو آخساق آددیملار و یاغی بیتمیش چیراقلار کیمی، سوره کلی یانیب سؤنن آرزولارلا اؤز یئرلرینده ساییب دورورلار. او انسانلار، کئچمیشدن اؤزلرینه کدر، گله جکدن اؤزلرینه کابوسلو قدر یارادیرلار و تصوّر ائدیرلر کی انسان محدود بیر گوجه صاحبدیر، و احتیاجی اولان هر شئیی قازانماغا و الده ائتمه یه قادر دئییلدیر.
اونلار اوجسوز بوجاقسیز بو کاییناتین پارچاسی اولدوقلارینین فرقینده دئییللر! اونا گؤره بیریلری اونلار اوچون شانسلی، بیریلری ایسه شانس سیز کیمی گلیر. حال بو کی شانس و شانس سیزلیق بئله، انسان بئینی نین یاراتدیغی بیر قاورام و حیاتا کئچیردیگی بیر حالدیر.
بو حیاتدا استثناسیز هر کس ایسته دیگینی وار ائتمه یه و یاراتماغا قادردیر، یئتر کی کاییناتدا کی اؤز منزیلینی و ده یرینی بیلیب اونا گؤره داورانسین.
اؤزونه اینانیب خیاللاریندان و آرزولاریندان واز کئچمه مه یی، و باشلادیغی هر ایشی، هر یولو سونونا قدر اوسانمادان یورولمادان دوام ائتمه یی اؤزونه بیر ایلکه ائدیب، پرنسیپه دؤنوشدورمه یی بیلسین.
هامیمیز بونو دریندن آنلاییب بیلمه لی ییک کی، آرزوسوز و خیالسیز هر انسان، ساده جه هدفسیزجه اؤز یئرینده چیرپینیب دوران بیر نئچه کیلو ات، قان و سوموکدن عبارتدیر.
خیال و آرزو کاییناتین بیزه بخش ائتدیگی ان یوکسک مقام و ان کسگین سلاحدیر!
بیز “وار تاپ اول” ائکیپی اولاراق، بوندان بئله انسان و حیات خئیرینه اولان قوُروجو آرزولاریمیزی گئرچکلشدیرمک آدینا، بیزیمله بیرگه بو یولدا ایره لی له مک ایسته ینلرین یولونا ایشیق توتماغی و ان چاغداش و تآثیرلی دوشونجه و تجربه لری “سسلی کیتابلار” قالبینده پایلاشماغی اؤزوموزه مقصدی بللی اولان خریطه و یول بلله دیک و بو یولدا آراشدیریب آختاریب تاپیب وار ائتمک بیزدن، آلیب اوخویوب دینله ییب دوشونمک سیزدن اولسون.
سایغیلاریمیزلا
وار تاپ اول
